ગુજરાત નજીકનું ગોવા એટલે દમણ. દક્ષિણ ગુજરાતના લોકોને બે-એક દિવસની રજામાં ફરવા જવું હોય તો પહેલો વિચાર દમણનો આવે. દમણ મહદંશે તેના દરિયા કિનારા માટે જાણીતું છે. પરંતુ દમણમાં રમણીય દરિયા કિનારા ઉપરાંત જોવા જેવુ બીજુ ઘણું બધું છે જેનો તમને કદાચ ખ્યાલ નહિ આવે. અહીં અનેક એવી સુંદર ઈમારતો છે જેની પાછળનો ઈતિહાસ પણ એટલો જ રોમાંચક છે. દમણ-સેલવાસા ફરવા જશો તો તમને પોર્ચુગીઝ સંસ્કૃતિની ઝલક જોવા મળશે. તો વાંચો દમણમાં ખાસ શું શું જોવા જેવું છે.
દમણમાં શું શું કરી શકો?
દમણ ખૂબ જ રમણીય જગ્યા છે. અહીં તમને હોટેલ્સમાં ટેસ્ટી બ્રેકફાસ્ટ લંચ અને ડિનર મળશે. સાથે તમે સર્ફિંગ કરી શકો છો. જ્વેલરી શોપિંગ માટે પણ દમણ વખણાય છે. દમણમાં અનેક ઐતિહાસિક ઈમારતો આવેલી છે જેની તમે મુલાકાત લઈ શકો છો.
મિરાસોલ લેક ગાર્ડનઃ
આ ગાર્ડન દેવકા બીચ નજીક આવેલો છે. બીચ પર ફરવા ગયેલા અનેક લોકોને આ લેક ગાર્ડન જોઈને નવાઈ લાગે છે. તે દમણ કડૈયા લેક ગાર્ડન તરીકે પણ ઓળખાય છે. અહીં તમે બોટ અને ટ્રેન રાઈડ્સ લઈ શકો છો. ફૂવારાની સુંદરતા પણ તમને દંગ કરી દેશે. અહીં ફૂડ પણ ખૂબ ટેસ્ટી મળે છે. આથી ભૂખ લાગી હોય તો આ લેક ગાર્ડન કરતા બીજો સારો વિકલ્પ હોઈ જ ન શકે. આ ઉપરાંત તમે અહીં કુદરતની સુંદરતાને પૂરેપૂરી માણી શકશો. અહીં અનેક ફિલ્મોના શૂટિંગ થયા છે.
પોર્ટુગીઝ ચર્ચઃ
અહીં પોર્ટુગીઝ ચર્ચ અને ઘર આવેલા છે જેમાં તમને આજની તારીખે લાકડા પર પોર્ટુગીઝ સ્ટાઈલની કોતરણી જોવા મળશે. બોમ જીસસનું ચર્ચ સૌથી વધારે વખણાય છે. તે મોટી દમણ વિસ્તારમાં આવેલું છે. ASI (આર્કિઓલોજિકલ સર્વે ઑફ ઈન્ડિયા) અહીં વૂડ પેનલની જાળવણીનું કામ કરે છે. અહીં ચર્ચની કોતરણી જોઈને તમારુ દિમાગ કામ નહિં કરે.
ચેપલઃ
મોટી દમણ ફોર્ટને અડીને જ લેડી ઑફ રોઝરીનું ચેપલ આવેલું છે. તેમાં મેરી ઑફ રોઝરીનુ સ્ટેચ્યુ છે. અહીં બાઈબલના અનેક કિસ્સાઓને દિવાલ પર ચીતરવામાં આવ્યા છે જેમાં પ્રખ્યાત લાસ્ટ સપરનો પણ સમાવેશ થાય છે. વાસ્તવમાં આ ચિત્રો સોનાથી પેઈન્ટ કરવામાં આવ્યા હતા પણ સમય જતા ઘણું ઊખડી ગયયું છે. આ ચેપલ જીસસની માતા મેરીની યાદમાં બનાવવામાં આવ્યું હતું. આ જગ્યાએ તમને ખ્રિસ્તી કલાકૃતિની ઝલક જોવા મળશે.
મોટી દમણ ફોર્ટ અને દીવાદાંડીઃ
દમણમાં બે કિલ્લા આવેલા છે. બંને દમણ ગંગા નદીની સામ સામી બાજુએ બાંધવામાં આવેલા છે. અહીં નદી અરબી સમુદ્રને મળે છે. અહીં તમને પોર્ચુગીઝ બાંધકામ યથાવત્ સ્થિતિમાં જોવા મળશે. આજે તેનો ઉપયોગ સરકારી ઑફિસ તરીકે કરવામાં આવે છે. મેઈન ગેટથી મોટી દમણના દરિયાઈ ગેટ સુધી ચાલતા પહોંચવામાં 20 મિનિટનો સમય લાગે છે. આ કિલ્લો 1559માં બાધવામાં આવ્યો હતો અને 16મી સદી સુધી તેનું બાંધકામ ચાલુ હતું. દરિયો ખેડતા વેપારીઓ માટે પોર્ચુગીઝોએ અહીં દીવા દાંડી પણ બનાવી હતી. આ સમગ્ર કિલ્લાની સુંદરતા જોઈને તમે મુગ્ધ થઈ જશો.
નાની દમણઃ
નાની દમણ અંગે તમે ભાગ્યે જ કશું સાંભળ્યું હશું. મોટી મોટી જગ્યા જોવા જતા યાત્રીઓ આ સુંદર સ્થળ ચૂકી જાય છે. અહીં તમને હેરિટેજ બિલ્ડિંગો જાવા મળશે. દમણ ખરેખર કેવું છે તે જાણવું હોય તો આ વિસ્તારમાં તમારે જવું જ રહ્યું. આ વિસ્તારમાં માર્કેટ પણ આવેલી છે જ્યાં તમે નાની-મોટી ખરીદી કરી શકો છો. અહીં તમને રસ્તા પર બાળકો રમતા જોવા મળશે. જોઈને જ લાગશે કે અહીંની લોકો કેવું શાંતિવાળુ જીવન જીવે છે. હેરિટેજ વૉક ગમતુ હોય તો દમણનો આ વિસ્તાર મિસ કરવા જેવો નથી. એ વાત અલગ છે કે હવે કેટલીક જગ્યાએ કદરૂપા મોડર્ન બિલ્ડિંગ બનવા માંડ્યા છે.
દેવકા અને જમ્પોર બીચઃ
દમણ મુખ્યત્વે બીચ માટે ઓળખાય છે અને અહીં મહારાષ્ટ્ર અને ગુજરાતમાંથી મોટી સંખ્યામાં પ્રવાસીઓ આવે છે. તેમાં મુખ્ય બે બીચ વખણાય છે, દેવકા અને જમ્પોર. દેવકા બીચ નાની દમણથી ત્રણ કિલોમીટર અને મુખ્ય શહેરથી બહાર આવેલો છે. જ્યારે જમ્પોર બીચ મોટી દમણથી 3 કિ.મી દૂર છે. તમે 40 રૂપિયાના ભાડામાં રિક્ષાથી પણ આ જગ્યાઓએ પહોંચી શકો છો. બંને દરિયાકિનારા સુંદરતામાં બેજોડ છે.
